Archive

Monthly Archives: January 2017

___________________________________________________________________________________________

第四年,停下時光,靜止衰老。

首先,熱烈歡迎寶寶,應該早就要捉埋你入黎呢度,抱歉呢。之不過,遲到好過冇到,總算都將你拉左入黎,希望來年日子,團隊裡多左個人,我地會更團結,我地嘅青春更可以不老地,熟稔落去啦。請好好對待我呢番說話,我係好認真的。你嘅加入,我覺得成件事好One Piece,哈。謝謝你比我花時間口水,不斷咁同你分享設計事宜,我地可以窮到乜都冇,但格調同品味,我地失去唔起。

或者有人比較貼近,有人比較疏離。我只係想講,一日自己唔放棄自己,一日我都唔放棄你,來年希望多啲機會見下你,多啲機會再傾計啦我地。好耐冇一齊食下飯,飲下野,傾下計了。得閒有空又有心,請多出黎,見個面呢。

好,到好重要嘅呢一對。其實好多說話,我經已同左你講太多太多太多喇,呢度唔講太多,只想講,見到你變得強大,身邊有個對的人,係好戥你地開心同欣喜嘅,希望你繼續自信滿滿,你是你本身的傳奇,幾經風浪也是你,一齊加油;而一直都比我感覺,就算天跳落黎都可以撐得住,跨越左西藏同北歐嘅接近神嘅男人,希望你嘅強大,可以撐得住你地兩個,一直走一直走,最好嘅,經已掌握響你地彼此了,呵。我只想講,唔,我唔知道對於你地兩個之間,有幾多人支持同反視或者食下花生毫不在意,但無論如何,我都會對你地兩個,衷心支持。衷心的再一次,謝謝你兩個,衷心感謝你地,請兩個人往後,好好的,努力加油,好好維繫,好好融合,好好經營,閃耀著屬於你地嘅路途。

至於我自己,今年不過不失,來年只係想搵到多啲光,照一照暖自己,令自己更強大,更懂收放。再為三十而立第一員,要好好掌管好隻舵,穩固好自己,先唔會令呢首友誼的小船翻淹。

未來一年,迎接三字頭,相信會有更多嘅關口,更多嘅挑戰,希望我地幾個,仍然可以莫忘初衷,迎難而上。我地未必就由一開始,好熟識好了解彼此,但我好慶幸同大家一齊,踏上無盡旅途,細賞無限嘅風景。快樂有時,風景有時,約定有時,來年有機會,總會看到要看嘅風景,大家都要好好努力,好好加油。

我感激這年春天,花再開遍,祝福相獻,待那丘彼特放出新一箭。祝願各位新一年,新考驗,新衝刺,蓄勢待發精彩嘅新一箭。

— 特此獻給五個學會爭氣未能放棄嘅小學雞

after_ten_4th_anniversary_20170104-01

Advertisements