Archive

Uncategorized

___________________________________________________________________________________________

三十而立,第五年,霎眼之間,我地幾個就黎到三字頭喇。

時日無多,方不敢偷懶。三十歲喇,我地響度做緊啲乜呀?呢個問題,有時候真係唔知應該點答,點去面對,人愈黎愈大,好多野都唔同以前,煩惱唔係話你可以大被冚頭一覺瞓著,第二朝就會解決,好多野好想做好多野好想嘗試,但係時間好似行得愈黎愈快,好多事情都好似身不由已咁,唔受控制咁樣,條路愈用力行,愈覺得無力,愈覺得了無方向,好迷茫,有一種白忙一趟嘅感覺。我嘅三十歲,困擾住我嘅,就有呢啲無病呻吟嘅煩惱,令我舉棋不定,好似跌左入黑洞當中。

感謝永遠有歌,把心境道破。可幸我生命入面,有陳奕迅嘅音樂出現,豐富住我,呢一年特好迷茫,可幸我可以聽住佢嘅歌,治療住我,引領我響黑洞入面,搵一點點嘅光,行前面仍然要行嘅路。好害怕行,但無辦法,無論如何都要向前行,衝過去。唔知你地嘅三十關口又點呢?會唔會同我一樣好迷失好惆悵?或者好好奇好亢奮呢?不過回望最初一我都好感恩,響小學嘅小天地度,遇見彼此,有人會覺得能夠同一班小學同學一直維繫到感情,一啲都唔容易,我都覺唔易,但我覺得難能在嘅唔係單單超過二十年時間嘅相識信任,而係超過二十年嘅時間裡,我地嘅關係變化,由生疏到熟稔,由親近到陌生,我地五個走到三字頭嘅今天,應然可以真心講,真心笑,我特別珍惜呢一份真摯。唔知道幾時,我地又會變得疏遠,但我唔理得咁多,我會繼續享受同你地熟稔同真摯嘅每一天,仍然牽繫住嘅依絆,無任何理由要鬆手,令佢白白溜走。希望你地同我一樣,會好好珍惜,在艱彌厲,堅持到底呢。

你的路,我的途,再也不分己與彼。林楚琪,顧兆豐,我剛剛嘅一年,我覺得最幸福最感動嘅人生大事,就係你地兩個結婚呢一件事。多年前同林楚琪一直許下嘅承諾,我終於都可以用我嘅所長,好好去實現,亦都覺得好感動同不可思議係,身邊兩個嘅小學同窗,最後可以走在一起,步入教堂,係相當奇妙嘅一件事。我會盡我嘅努力同我嘅潛能,將最好嘅都獻比你地,新嘅章節裡,兩個人都要加油比多啲信心,彼此好好珍惜,好好經營,屬於你地嘅一生之旅,長途伴侶,由3月3日開始,為你地嘅偉大航度,好好咁牽著彼此,踏上征途喇,作為同窗,可以做嘅,就係多廢話地送上無限祝福,無限支持,仲有會一直給予無限量嘅信心呢。一齊,加油啦各位!

毫無代價唱最幸福的歌,願我可。我好喜歡好喜歡好喜歡,今年叱咤三十嘅口號,為明日回憶,短短五個字,約過去現在將來嘅三個階段,唔同嘅關口都打開,將生命線聯上起來,好似有看清自己生命版圖嘅啓示咁,令迷失嘅自己,好似搵到點點方向。同兩日前所講,最令我窩心揪心嘅環節,就係陳奕迅,林海峰,何秉舜嘅唱盡我的叱咤快好時代環節,每一秒都感動,每一秒都揪心。青春或者真係好戅居,甚至乎戇尻,但我地每一個,都曾經響戅居嘅青春裡,精彩過,燦爛過,熱血過,能夠有過令自己精彩嘅青春,即使有遺憾,仍然可以好好過,仍然值得好好過。青春過後,仍然慶幸我地依然可以,為自己嘅最喜愛的,繼續投下自已嘅生命一票,為明日回憶,依然可以精彩,依然可以快樂,我相信可以,我更相信你地每一個,都可以。

不能滿足,不敢停站,然後怎樣。三十而立,今年我送比自己嘅,就係呢十二個字,縱然響三十關口有啲前景未明,難題未解,大門未開,我唯一可以做嘅,就係默默堅持,一直走落去,每一步都要走得有力氣,個人會好攰咖。偶爾放鬆下,總有唔同嘅風景,用自己嘅步伐,撐過去。假使世界原來不像你預期,懷著一顆謙卑,面對不安天氣,時日在變遷,不減你是你,然後怎樣我真係唔知,重要是呢一刻我仍然可以,活得更自己。三十歲,仍然有好多未知嘅關卡,我都唔知道將來會發生咩事,點都好,珍惜呢一刻擁有嘅一切,珍惜每一個我仍然在意嘅人,努力咁做好我自己,咁樣就足夠了。新年快樂,大家都要響各自嘅路上,加油加持,活出我地嘅精彩三十,然後我地響三十一,繼續再見。

—  特此獻給五個自在地去活真的你嘅小學雞

After_Ten_5th_Anniversary_20180104

Advertisements